Lucus

Existe unha cidade que che rouba o corazón, unha cidade que te apresa e xa nunca te deixa, unha cidade que necesitas, que te chama, e que cando estás lonxe chóraslle e entendes o significado da melancolía. Cada vez que volto enaxénome dela e síntome chea de algo que debe ser espíritu ou tal vez sexa a miña alma que agarda ó meu corpo detrás da muralla, sexa o que sexa pídeme que volva, demasiado tempo alonxadas, dase conta de que se non chego a tempo esquecerei o que realmente son.
Aquí xa nada é o mesmo, a aventura rematou e agora queda a realidade, a hora de voltar, de non buscar mais, pois unha vez todo explorado hai que voltar ó carón da nai que me acuna, a cidade que me protexe, a tranquilidade que me axuda a non entolecer.
Si, tenche defectos, pero parecen menos importantes que noutro lugar.

Sempre estarei regresando.